Вероника Павлова, Евгения Зиновьева, Екатерина Янгалакова
Çамрăксем эрне ĕнтĕ Октябрьски поселокĕ çывăхĕнчи çĕре тĕпчеççĕ. Ĕçе тимлĕ тăваççĕ, инженери тата харушсăрлăх йĕркисене пăхăнса чаваççĕ. Кунта «Волжский рубеж» фестиваль йĕркелеме палăртаççĕ. Ун вăхăтĕнче совет салтакĕсем нимĕçсене хирĕç 1942 çулта мĕнле çапăçнине кăтартасшăн. Унсăр пуçне çамрăксем хаяр вăрçăпа çыхăннă япаласене шыраççĕ. Вĕсен шухăшĕпе, 42-44-мĕш çулсенче кунта Атăл тăрăхĕнчи хÿтĕлев чикки пулнă, 95-мĕш полк вырнаçнă. Ун йышĕнче - Шупашкарти стрелоксен 14-мĕш бригади. Вăл 3 пине яхăн салтака пĕрлештернĕ.
Аслă вăрçăпа çыхăннă нумай пулăма халĕ те уçăмлатман. Вăл шутра Атăл тăрăхĕнчи хÿтĕлев чикки пирки те архивсенче информаци çук.
Тĕрлĕ хĕç-пăшал пайĕсем, чашăк-кашăк тата лаша тури - шыравçĕсем мĕн кăна тупмаççĕ. Тăшман пиçиххин тăххине те чавса кăларнă вĕсем. Специалистсен шухăшĕпе, ăна пирĕннисемех е тыткăна лекнĕ нимĕç çак тăрăха çитернĕ. Тăван çĕршывăн историне уçăмлатма 100 яхăн çамрăк кăмăлланă. Çакăн пек йышлă ушкăнпа пĕрремĕш хут ĕçлеççĕ.
Çамрăксемшĕн кунта кăсăкли нумай. Тĕслĕхрен, çакăн пек çĕрпÿртре 50 яхăн çын вырнаçма пултарнă. Хÿтлĕхре кăмака та пулнă. Сменăна çĕршыв Президенчĕн гранчĕ пулăшнипе йĕркеленĕ. Укçа-тенкĕпе ачасене вырнаçтарнă, шырамалли хатĕрсем туяннă тата ытти те. Тĕпчемелли кунта нумай, çавăнпа хастарсем çитес çул ĕçе малалла тăсма палăртаççĕ.
Источник: ГТРК Чувашия
17.09.2018 10:33