Алиса Александрова, Михаил Солин
55 çулхи юбилейĕ тĕлне 10-мĕш шкула валли хула администрацийĕ пысăк парне — çĕнĕ йышши футбол площадки хатĕрленĕ. Халĕ кунта иртен пуçласа каçчен, хĕлĕн-çăвĕн ачасемпе çамрăксем хĕвĕшеççĕ.
Чемпионат тĕлне Шупашкарти «Спартак» тата «Олимпийский» стадионсенче тренировкăсем ирттермелли тĕнче шайĕнчи лаптăксем хатĕрленĕ. Улшăнса çĕнелнĕ «Спартак» ушкăнсене йышăнма хатĕр. Трибунăсем, хывăнса тăхăнмалли пÿлĕмсем, конференц-зал — пĕтĕмпех çĕнĕлле. Футбол уйне ятарлă курăк акнă, им-çам сапсах тăраççĕ.
Сывлăхпа спорт кунĕнче сывă пурнăç йĕркине пăхăнакансем валли кунта чупмалли çулсене уçĕç. Стадионта малашне Шупашкарти «Спартак» ушкăн тĕпленĕ, футбол ăмăртăвĕсене те кунтах ирттерĕç. Соляново микрорайонта пурăнакансем валли те спорт лаптăкĕ йĕркеленĕ. Çулла футболла вылякансене, хĕлле хоккеистсемпе конькипе ярăнма кăмăллакансене йышăнма пултарĕ вăл. Ятарлă программа хулара аван ĕçлет пулин те, кăлтăксем те пур.
Сосновкăра, сăмахран, пĕлтĕр уçма палăртнă спорт лаптăкне, подрядчик явапсăрлахне пула халĕ те хута ярайман. «Ачасене кунта кĕртме хăратпăр. Ячĕшĕн туса лартнă вырăнта ÿкме те, аманма та пулать», - теççĕ 10-мĕш спорт шкулĕнче ĕçлекенсем. Çавăнпа та Шупашкар хула администрацийĕ строительсемпе тунă килĕшĕве пăрахăçланă. Ку ĕçе хальлĕхе вĕçне-хĕрне çитермен-ха. Спорт площадкисене юсаса çĕнетес программа вара малалла пурнăçланĕ. Унпа килĕшÿллĕн кăçал 56-мĕш тата 27-мĕш шкулсенчи футбол уйĕсене çĕнетĕç.
Источник: ГТРК Чувашия
28.06.2018 22:21